Ciidamada Gumeysiga ee Sahyuuniyadda ayaa maalintii seddaxaad waxay sii wadaan xoog ku galidda Masjidka barakeysan ee Al-Aqsaa, iyagoona saakay aroortii xiray qeybo ka mid ah Masjidka, islamarkaana is hortaag ku sameeyay qaar ka tirsan dadweynihii doonayay inay Masjidka gudaha u galaan.
Boqollaal ruux oo Muslimiin ah oo tan iyo markii ay billaabatay bishan barakeysan ee Ramadaan ku dhex ictikaafayay gudaha Masjidka ayaa iska hor imaad gacmaha la isula tagay la galay Ciidamada Yahuudda ee soo galay qeybo ka tirsan Masjidka, iyadoona Muuqaallo lasoo qaaday laga dhex arkayay Booliiska Yahuudda oo Budad la dhacaya dadkii ku sugnaa gudaha Masjidka.
Tobnaan ruux oo Filastiiniyiin ah ayaa ku dhaawacmay isku dhacyadaasi, waxaana la arkayay qaar ka tirsan dadka dhaawacyada ah oo madaxooda iyo wejigoodu uu dhiig qariyay, kuwaas oo waxyeello ay kasoo gaartay Budadkii iyo ulihii ay la dhaceen Ciidamada Sahyuniyadda.
Weriye ka tirsan Telefeshinka Al-Jazeera oo ku suga magaalada Al-Qudus ayaa sheegay inuu arkay Boqollaal ruux oo Filastiiniyiin ah oo ku sugan gudaha Masjidka barakeysan ee Al-Aqsa, kuwaas oo sita dhagaxaan, islamarkaana u diyaarsan inay mar walba ka hortagaan Kooxaha Yahuudda ee doonaya inay soo iqtixmaan Masjidkaasi.
Tan iyo intii billaabatay bisha barakeysan ee Ramadaan waxaa soo noq noqanayay isku dhacyada dadweynaha Filastiiniyiinta iyo Ciidamada Yahuudda ku dhex marayay Masjidka Al-Aqsa, iyadoona isku dhacyadaasi ay ku dhaawacmeen tobanaan ruux oo Filastiiniyiin ah.
