Dowladda Bangladesh oo Xukun dil ah ku fulisay Hoggaamiyihii Jamaacada islaamiga Ah Sheekh Mudiicu Raxmaan.

Wasiirka Garsoorka ee Dowladda Bangladesh ninka lagu magacaabo Aniis Al-Xaq ayaa sheegay in Mudhiicu Raxmaan oo 73 jir ahaa in xukunkaasi lagu fuliyay saqdii dhexe ee habeenkii xalay, iyadoona lagu dal dalay gudaha Xabsiga weyn ee magaalada Daka ee Caasimadda dalkaasi.

Hogaamiyaha Jamaacada islaamiga ah ee Dalka Bangladesh oo sidoo kale soo noqday Wasiir iyo Xubin ka tirsan Baarlamaanka Dowladda waxaa xukunka dilka ah lagu riday todobaadkii hore, kadib markii Maxkamadda sare ee dalkaasi ay ku heshay eedo la xiriira inuu gacan siiyay Ciidamada Meliteriga Pakistan, islamarkaana uu geystay waxa loogu yeeray Xasuuq wadareedyo xilligii uu socday dagaalkii dhacay 1971-kii, xiligaas oo Dowladda Bangladesh ay dooneysay inay ka go’do Wadanka Pakistan.

Hogaamiyihii Jamaacada islaamiga ah ee Wadanka Bangladesh ayaa ka hor inta aan xukunka dal-dalaadda ah lagu fulin waxa uu la kulmay xubnaha qoyskiisa si uu u sagootiyo, waxaana uu diiday in uu cafis weydiisto Madaxweynaha dalkaasi, si looga khafiifiyo xukunka dilka ah.
Dowladda Wadanka Bangladesh ayaa horey xukunno isugu jira dil iyo xarig waxay ugu diray hogaamiye-yaal iyo xubno ka tirsanaa Jamaacada islaamiga ah ee dalkaasi, waxaana ugu dambeeyay ku xigeenkii Jamaacadaasi Cabdul-qaadir Mulla , kaas oo dabayaaqadii sanadkii hore lagu fuliyay xukun dal dalaad ah.