Faahfaahin Laga Helayo Weeraro Ka Dhacay Duleedka Kismaayo.

Warar dheeraad ah ayaa kasoo baxaya dagaallo iyo qaraxyo saacadihii lasoo dhaafay ka dhacayay deegaanno katirsan gobollada Jubbooyinka ee dhaca Koonfurta dalka Soomaaliya.

Ugu yaraan laba qarax ayaa kolonyo ciidamo Mareykan iyo Kenyaan ah lagula beegsaday deegaanka dhaca duleedka waqooyi ee magaalada Dekadda leh ee Kismaayo.

Dadka deegaanka ayaa sheegay in ay maqleen jugta ugu yaraan laba qarax oo ahaa Miinada dhulka lagu aaso, xoogag katirsan Xarakada Al Shabaab aya ciidamada huwanta ah u dhigay weerar dhabagal ah xilli ay ku socdaalayeen inta u dhaxaysa Buula Guduud iyo Yoontooy.

Mid kamida gaadiidka qafilan oo ay wateen saraakiisha Mareykanka ayaa la xaqiijiyay in ay Miino lakacday waxaana jira khasaara dhimasho iyo dhaawac ah oo gaaray ciidamada huwanta ah.

Ilo wareedyo ayaa sheegaya in ay fashilmeen isku dayo ay ciidamada gumeysiga Kenya iyo kuwa Mareykanka ay ku gaaraan deegaanno dhaca duleedka Kismaayo oo wilaayada Islaamiga ah maamusho.