Dad ku dhow 80 ruux ayaa ku dhintay, inkabadan 200 oo kalena way dhaawacmeen kadib duqeymo xooggan oo diyaaradaha Dagaalka ee Nidaamka Nuseyriga ay saacadihii lasoo dhaafay ka geysteen deegaanno kala duwan oo kuyaalla Dalka Suuriya.
Khasaaraha ugu badan waxa uu ka dhacay magaalada lagu magacaabo Macarratu-Nacmaan ee Baadiyaha Gobolka Idlib, iyadoona diyaaradaha dagaalku ay duqeeyeen Suuq lagu iibiyo Hilibka iyo Khudaarta oo magaaladaas kuyaalla, halkaas oo ay ku nafwaayeen inkabadan 40 ruux, boqol kalena ay ku dhaawacmeen.
Duqeyn kale oo ka dhacday degmada Kafar-Nabal ee Gobolka Idlib ayaa waxaa ku dhintay tobon ruux, waxaana duqeyntaasi ay timid kadib markii diyaaradaha Nidaamku ay duqeeyeen Xaafado ay dadka rayid ah dagan yihiin oo degaankaasi kuyaalla.
Sidoo kale duqeymo ka dhacay deegaanno hoos yimaada Gobollada Xalab, Dimishiq, iyo idlib ayaa waxaa ku dhintay Soddomeeyo ruux, waxaana duqeymahani ay noqonayaan kuwii ugu cuslaa ee ay geystaan diyaaradaha Nidaamka ee Bashaar Al-Asad, tan iyo intii lagu dhawaaqay heshiiskii xabad joojinta ahaa.
