Khasaara xooggan ayaa dhashay Daadad iyo fatahaada hor leh oo ku dhuftay inta badan gobollada uu ka koobanyahay wadanka Suudaan ee dhaca Bariga qaaradda Afrika.
Wararka ka imaanaya magaalada Khurduum ee caasimadda u ah wadankaas ayaa sheegaya in roobab mahiigaan ah oo da’ayay wax kabadan 5 saacadood oo xiriir ah ay sababeen fatahaado khasaara badan dhaliyay.
Biyaha roobka ayaa burburiyay buundooyin iyo guryo dad shacab ah deganaayeen, wasaaradda arrimaha xukuumadda dabadhilifka Suudaan ayaa ku dhawaaqday in 13 gobol gobolka oo katirsan 18-ka gobolka ee wadanku ka koobanyahay ay kajirto xaalad musiibo ah islamarkaana daad iyo fatahaad ku dhufteen.
Ugu yaraan 76 qof ayaa ku dhintay Daadad ka dhashay roobab Mahiigaan oo waddanka oo idil camimay iyo Fatahaad uu sameynayo mid kamida wabiyada mara gobollada dhaca bariga iyo bartamaha suudaan.
Gobolka Kasala oo isbuucii lasoo dhaafay looga dhawaaqay xaalad musiibo ah ayaa lasoo sheegayaa in tobaneeyo carruur iyo haween ah ay daadku qaadeen islamarkaana ay burbureen 3206 guri.
Maamulayaasha Suudaan waxay sheegeen in garoonka diyaaradaha caalamiga Al-khurduum uu isku bedelay meel biya Fadhiisad ah islamarkaana ay la tacaalayaan in biyuhu aysan joojin shaqadii garoonka.
Wararka ayaa intaasi ku daraya in wabiga Niil ee mara wadanka Suudaan uu biya xad-dhaaf ah keenay taasi oo sababtay in fatahaaduhu ay baabi’iyaan magaalooyin iyo tuulooyin dhowr ah.
Wariyaasha ayaa soo sheegay in musiibada hadda taagan aysan dhicin wax ka badan 100 sanadood.
Malaayiin qof ayaa la sheegay in ay ka Barakaceen guryahooda si ay uga badbaadaan biyaha sida xowlliga ah ku socda.
