Laba Askari oo ka tirsan Ciidamada Booliiska ee Dowladda daba dhilifka ee Turkiga ayaa dhintay, dhowr iyo Soddon kalena way ku dhaawacmeen weerar loo adeegsaday gaari laga soo buuxiyay walxaha qarxa oo lala beegsaday Saldhig ay Ciidamada Ammaanku ku leeyihiin Gobolka Maardiin ee Koonfurta bariga dalkaasi.
Ilo wareedyo dhanka Ammaanka qaabilsan ayaa sheegay in gaariga uu ku qarxay guryo ay daganaayeen Ciidamada Booliiska, waxaana weerarkaas uu ka dhacay degmada lagu magacaabo Nasiibiin ee ka tirsan Gobolka Maardiin ee saaran Xadka beenaadka ay wadaagaan dalalka Turkiga iyo Suuriya.
Wakaaladda Wararka Anadol ayaa kasoo xigatay Ilo wareedyo Maxalli ah in weerarkaas qaraxa ah uu sababay waxyeello xooggan oo soo gaartay saldhiggii ay Ciidamadu daganaayeen, iyadoona qaraxa gaariga uu xigay weerar kale oo Sawaariikh loo adeegsaday oo saldhigga lagu soo qaaday.
Illaa iyo hadda ma jirto cid sheegatay mas’uuliyadda weerarkaas khasaaraha nafeed dhaliyay ee lagu qaaday saldhig ay lahaayeen Ciidamada Booliiska ee dalka Turkiga, balse waxaa loo maleynayaa in howl-galkaasi ay fuliyeen Kooxda Kurdish-ka ah ee loo yaqaano PKK ee Calmaaniyiinta ah, kuwaas oo muddo sanado ah dagaal xooggan kula jira Xukuumadda Ankara.
