Shirkadda duulimaadyada diyaaradaha ee dalka Masar ee loo yaqaano Egypt Air ayaa ugu dambeyntii si rasmi ah daboolka uga qaaday inay bur burtay diyaaraddii laga lahaa dalkaasi ee kasoo duushay magaalada Paris,kuna socotay magaalada Qaahira, taas oo laga waayay raadaarka waxyar kadib markii ay soo gashay hawada dalka Masar.
War ay soo saartay Shirkadda oo ku socday eheladda dadkii rakaabka ahaa ee diyaaraddaas la socday ayaa waxaa lagu sheegay in Shirkaddu aad ugu xun tahay shilkaasi, islamarkaana ay dhibaatada iyo murugta ay la wadaageyso ehellada iyo qoysaskii ay ka tageen dadkii ku dhintay bur burka diyaaradda.
Diyaaradda ay iska laheyd Shirkadda Egypt Air oo tirsiga duulimaadkeedu ahaa MS804 ayaa waxay kasoo duushay garoonka diyaaradaha Sharli Digol ee duleedka magaalada Paris ee Caasimadda Dalka Faransiiska, iyadoona kusoo jeeday Garoonka diyaaradaha ee magaalada Qaahira, balse laamaha Socdaalka ee Dalka Masar ayaa waxay sheegeen in diyaaradda oo ay saarnaayeen inkabadan Lixdan ruux si kedis ah loo waayay, waxaana wararka horudhaca ah ee soo baxay ay sheegayaan in diyuuradda ay ku dhacday badda Mediterranean-ka.
Mas’uuliyiinta Faransiiska iyo kuwa Dalka Masar ayaan meesha ka saarin in diyaaraddu ay u bur burtay natiijo ka dhalatay walxo qarxa oo dhexdeeda la saaray, inkastoo illaa iyo hadda aysan jirin cid si rasmi ah u sheegatay mas’uuliyadda soo dhicitaanka diyaaraddaasi.
Rakaabkii la socday Diyaaradda bur burtay ayaa waxay badankood kasoo jeedeen Dalka Masar, waxaa sidoo kale saarnaa 15 ruux  oo Faransiis ah iyo toboneeyo ruux oo kale oo kasoo kala jeeday Wadamo ay ka mid yihiin Ingiriiska, Biljam, Suudaan, Portogal, Sacuudiga iyo dalal kale.
