Weeraro Culus Oo Lala Beegsaday Askarta Dowlada Iyo Kuwa Shisheeyaha.

Dagaallo Xooggan ayaa markale dib uga qarxay deegaanno dhaca duleedka galbeed ee magaalada Muqdisho oo xilliyadii dambe bartilmaameed u ahaa xoogaga Shabaabul Mujaahidiin.

Wararka ka imaanaya deegaanka Ceelasha Biyaha ayaa sheegaya in dagaallo culus ay xalay ka dhaceen saldhigyada ciidamada shisheeyaha AMISOM iyo maleeshiyaadka dowladda Federaalka.

Dagaalka oo bilaawday xalay fiidkii ayaa soo gaaray saqdii dhexe, ciidamo aad u hubeysan oo katirsan Shabaabul Mujaahidiin ayaa weeraro safballaaran ah ku qaaday saldhig ciidamada shisheeye ku leeyihiin xaafadda Arbacoow oo kamid ah deegaan weynaha Ceelasha.

Weerarka oo isku bedelay dagaal saacado badan qaatay wuxuu ku bilaawday madaafiic lagu duqeeyay saldhigga AMISOM kadibna waxaa xigay weeraro fool ka fool ah.

Goob joogayaal ku sugan Ceelasha Biyaha ayaa warbaahinta u sheegay in ay maqlayeen jugta madaafiicda iyo daryanka rasaasta labada dhinac isdhaafsanayeen.

Wararka ayaa intaas ku daraya in xoogaga Al Shabaab ay dagaalka kadib socod ku mareen xaafado katirsan deegaannada Calamada,Ceelasha iyo Lafoole, waa habeenkii 2-aad oo dagaallo ay ka dhacaan deegaannada dhanka galbeedka uga beegan magaalada Muqdisho.

Dhinaca kale weeraro loo adeegsaday Bambaanooyinka gacanta laga tuuro ayaa xalay ka dhacay saldhigyo ciidan oo kuyaal degmooyin katirsan gobolka Banaadir.

Xoogag hubeysan ayaa Laba Bambaano ku weeraray Laanta Suuq Bacaad iyo saldhigga degmada Shibis, illaa iyo hadda lama oga khasaaraha ka dhashay weeraradan.

Comments are closed.